هاد كان زمان

بجانب الكانونة لتشعل النار وهي تنادي إبنتها هاتي الزيت والطنجرة

البنت:بس ما في زيت ماما

الأم:نسيت أنو ليتر الزيت بسبع ألاف يعني مارح يشتري الزيت إلا يلي بدو يطلعلوفانوس علاء الدين.لكن هاتي السمنة

البنت:ليش في سمنة

الأم: أي مبارح أبوكي اشترا بألف اليرة

البنت:بس كأن العلبة فاضية

الأم:فيها العلبة بس هنن كتيرقلال يادوب بسفل العلبة حطي شوي بالطنجرة

(مسكت البنت العلبة وبدءت تسكب منها ولسا يادوب نزل كم نقطة )

صرخت الأم بأعلى صوتها:”بس. ..بس…”ارتعبت البنت ووقفت عن السكب

البنت:”ما ما بس يادوب سكبت كم نقطة”

لأم:”ليش يابنتي مابتعرفي أنو السمنة كتير بتعمل كولسترول

البنت:ماما بس إنتي طول عمرك بتحبي السمنة كتيرة بالأكل وخاصة إذا كان لأكلة برغل يعني متل اليوم

الأم:هاد كان زمان يابنتي مو هلاء وقت صار سعر كيلو السمنة خمس آلاف قومي يا ماما وهاتي الملح وحطي للطبخة ملح الله يرضى عليكي

( مسكت البنت الملح ولسه يادوب حطت كم حبة صرخت الأم صوت أعلى من أول مرة) بس. …بس…بس

البنت:ياماما لسى ماحطيت غير كم حبة

الأم: يا ماما ياعمري مابتعرفي أنو الملح بيرفع الضغط مو ناقصنا ضغط وما في دواء بالغوطة

البنت:بس يا ماما بعمرو ما أرتفع الضغط مع حدا فينا بالعكس إنتي دائماً نازل ضغطك من فقر الدم

الأم:هاد كان زمان. هلاء مو بس بدو يرتفع معنا الضغط هلاء صار يمكن يصير معنا الجلطة وخاصة بعد ما صار سعر كيلو الملح 2700.شوفي الطبخة يابنتي الله يرضى عليكي استوت ولا لسه

البنت:لسه ماما (ومسكت قطعة حطب بدها تحطها بالكانونة)

الأم بصوت عالي:الطبخة جاهزة وما في أحسن من هيك

البنت:بس إنتي يا ماما ما بتحبي الأكل غير مستوي على الأخر يعني مو متل هيك

الأم:هاد كان زمان يا ماما قبل ما تصير جرة الغاز ب90ألف وكيلو الحطب ب250ليرة

روحي يا عمري طبقي أبريق الشاي وحطيه عالجمر أحسن ما يروحوا بلا فائدة

حطت البنت الأبريق وحملت السكر وبدها تحط طلعتلها أمها متل كل مرة بوجهة وقالت:لاتكتري سكر يا ماما مو ناقصنا يرتفع معنا السكر.

البنت:بس أنا ما حطيت غير نص عيار السكر بعدين من كاسة شاي وحدة مارح يرتفع معنا السكر

الأم:ولاتكثري شاي لأن الشاي التقيل بيعمل عصبي

البنت:بس إنتي طول عمرك بتحبي الشاي حلو وتقيل يعني “أكرك عجم “متل ما بتقولوي

الأم:هاد كان زمان قبل ما يصير كيلو السكر 4200وكيلوالشاي10000

صار العشا جاهز نادت البنت اجتمع الكل حول السفرة

الأب:شو هاد ليش هيك اللبن كأنو مي

الأم:أبنك فتل كل بقاليات حتى لقى نص كيلو لبن والكيلو ب600 ليرة قلت لحالي بزيدهن شوية مي مشان يكفو الأولاد

الأب:وين الخبز أنا مابعرف أكل بدون خبز

الزوجة:ولشو الخبز موشايف كرشك صاير نص متر قدامك خفف مشان صحتك

الأب (بنظرة تعجب) أنا وين الكرش بعمرو ماكان عندي كرش

الزوجة:هاد كان زمان هلاء ممكن يصير، لأن ربطة الخبز صارت1100مشان   هيك خفف مشان صحتك.

وبس تلاقي شغل بتصير تاكل خبز

امتى ما بدك. هاد إذ اجى يوم ولقيت….

هكذا تعيش معظم الأسر في الغوطة هذه ليست سيناريو قصة أو مسرحية هذا واقع أكثر 50 ألف من أسر الغوطة الشرقية حيث لاعمل وغلاء وصل لنسب  يجب أن توضع في “كتاب غينس” للأرقام القياسية .